မြန်မာ နေရှင်နယ်လိဂ် အသင်းသစ် ၃ သင်းကို အေးဂျင့်များ မျက်စိကျနေ

လာမည့် ဘောလုံး ရာသီတွင် မြန်မာ နေရှင်နယ်လိဂ်၌ ပါဝင်လာမည့် အသင်းသစ် ၃ သင်းကို ကစားသမား အေးဂျင့်များ မျက်စိ ကျနေကြကြောင်း သိရသည်။

ဒုတိယ အကြိမ်မြောက် မြန်မာ နေရှင်နယ်လိဂ် အမှတ်ပေး ပြိုင်ပွဲကို လာမည့် မတ်လအတွင်း စတင်ရန် ရှိနေရာ ယင်းပြိုင်ပွဲ၌ အသင်းသစ် (၃)သင်း ပါဝင်လာမည် ဖြစ်သည်။ အဆိုပါ အသင်းများမှာ ကချင်ပြည်နယ် ကိုယ်စား ပြုမည့် မနောမြေ FC ၊ ကရင်ပြည်နယ် ကိုယ်စား ပြုမည့် ဇွဲကပင် ယူနိုက်တက်နှင့် နေပြည့်တော်ကို ကိုယ်စားပြုမည့် နေပြည်တော် FC တို့ ဖြစ်ကြသည်။ အဆိုပါ အသင်းများအနက် SARA FC တစ်ဖြစ်လည်း ဇွဲကပင် ယူနိုက်တက်မှ လွဲ၍ ကျန်နှစ်သင်းမှာ ယခုမှ စတင် ဖွဲ့စည်းမည့် အသင်းများ ဖြစ်ကြသည်။ အသင်းများ အားလုံးသည် နိုင်ငံခြားသား ကစားသမားများ ခေါ်ယူ မည်ဟု လေသံပစ် ထားသောကြောင့် ကစားသမား အေးဂျင့်များက စိတ်ဝင်စား နေခြင်း ဖြစ်သည်။

“ကျွန်တော့် အနေနဲ့ လောလောဆယ်မှာ လက်ရှိ အသင်း(၈)သင်းက တာဝန်ရှိသူ တွေနဲ့ စကား ပြောနေပါတယ်။ ပြီးတော့ နောက်ထပ် အသစ်ဖွဲ့စည်းတဲ့ အသင်း ၃ သင်းကိုလည်း စိတ်ဝင်စား နေပါတယ်။ အဲဒီ အသင်းတွေက ပိုင်ရှင်တွေ၊ တာဝန် ရှိသူ တွေနဲ့ သွားရောက် ညှိနှိုင်းပြီး ကစားသမား ကောင်းတွေ ခေါ်ယူ ပေးဖို့ ဆန္ဒ ရှိပါတယ်။ ကျန်တဲ့ အသင်းတွေ အတွက်လည်း အဆင်သင့် သုံးနိုင်တဲ့ ကစားသမား ကောင်းတွေ ကျွန်တော့်မှာ အများကြီး ရှိပါတယ်” ဟု မလေးရှား အေးဂျင့် ကုမ္ပဏီ Excel Sports မှ ကိုယ်စားလှယ် အဒူလ်ဆလမ်က Soccer Myanmar သို့ ပြောကြားခဲ့သည်။

အဒူလ်ဆလမ်သည် ဖီဖာ လိုင်စင်ရ နိုက်ဂျီးရီးယား အေးဂျင့် ဘရစ်ဂျိုး အန်းနက်၏ ကုမ္ပဏီမှ ကိုယ်စားလှယ် ဖြစ်သည်။ ၎င်းအပြင် မလေးရှား အေးဂျင့် အက်ဖန်ဒီနှင့် လိုက်ဘေးရီးယား ဘောလုံး စီးပွားရေး သမား ရစ်ကီဆွမ်း တို့လည်း ယင်းအသင်း များကို စိတ်ဝင်စား နေသည်ဟု သိရသည်။ အေးဂျင့် အက်ဖန်ဒီမှာ မြန်မာ နိုင်ငံ သို့ပင် ရောက်နေပြီး အသင်း များနှင့် လိုက်လံ ဆွေးနွေးနေကြောင်း တွေ့ရသည်။

http://www.soccermyanmar.com မှကူးယူဖော်ပြသည်